Guja Sandholt starfar sem sjálfstætt starfandi söngkona og listrænn stjórnandi Óperudaga. Hún kemur reglulega fram sem einsöngvari og kórsöngvari í óperum, óratoríum, á tónleikum og ýmiss konar viðburðum. Auk þess gegnir hún hálfri stöðu hjá Hollenska útvarpskórnum í Hollandi.

Nýlega söng hún hlutverk Leonoru í uppfærslu Óperudaga á Fidelio - atlaga að óperu eftir Beethoven í leikstjórn Bjarna Thors Kristinssonar; Mattheusi unga í leikstjórn Albert Hoex, Verdi Requiem með Norðurópi, Mozart Requiem Singalong í Hallgrímskirkju og Ríkharði III, óperu í smíðum eftir Sigurð Sævarsson. Hún hefur flutt Súkkulaðikökuóperuna Bon appétit! eftir Lee Hoiby á O. Festival í Rotterdam, Eistlandi og víða á Íslandi. Á næstunni mun hún koma fram á Bach-Week-hátíðinni í Luther Museum í Amsterdam ásamt Tríó Ljósu; syngja í Akhnaten e. Philip Glass í Concertgebouw með Hollenska útvarpskórnum sem og á Holland Festival á tónleikum með verkum eftir Hildi Guðnadóttur og fleiri. Auk þess er hún í óðaönn að skipuleggja ýmsa viðburði Óperudaga á þessu og næstu árum. Hún hefur komið fram sem einsöngvari í óratóríum á borð við Mattheusarpassíunni, Messíasi, Messu í C efitr Beethoven, Stabat mater eftir Dvorak, Arvo Pärt og Pergolesi sem og Little Match Girl Passion eftir David Lang. Guja kemur reglulega fram með Heleen Vegter, ljóðapíanista og Tríó Ljósu ásamt Heleen og Diet Tilanus fiðluleikara. Hún er auk þess stofnmeðlimur Kammerhóps Laugarneskirkju..

Hugurinn hneigðist snemma til tónlistar og umhverfið mótaðist af henni. Daglegur morgunsöngur í Laugarnesskóla, tónlistaráhugi foreldranna, píanótímar hjá Erlu Stefáns og þátttaka í kórastarfi Langholtskirkju höfðu sterk áhrif í barnaæsku og settu tóninn fyrir það sem koma skyldi.

Guja stundaði píanó- og söngnám við Tónlistarskólann í Reykjavík hjá m.a. Svönu Víkings og Ruth Magnússon. Framhaldsnámi lauk hún frá Guildhall School of Music and Drama í London, Mozarteum tónlistarháskólanum í Salzburg og Konservatoríinu í Utrecht í Hollandi hjá Jóni Þorsteinssyni og Charlotte Margiono. Hún sótti reglulega einkatíma hjá Stephanie Doll í Düsseldorf en hefur á síðustu misserum sótt einkatíma hjá kennurum og raddþjálfum í Hollandi.

Nú til dags hefur Guja mikinn áhuga á að fást við fjölbreytt verkefni með áherslu á tónlist og samfélagsleg gildi. Þess vegna hafa Óperudagar verið dýrmætt tækifæri til að kanna nýjar söngslóðir á Íslandi og um leið mynda þéttan kjarna af fólki með svipaðar ástríður og markmið.